Baby Jaguars, greywolves gilihian og daog sa CESAFI

CEBU, Philippines — Gisugdan sa University of San Jose-Recoletos (USJ-R) Baby Jaguars ug Don Bosco Technical College (DBTC)-Cebu Greywolves ang ilang kampanya pinaagi sa usa ka masipang buto sa Cebu Schools Athletic Foundation, Inc. (CESAFI) Season 25 basketball tournament kagahapong adlawa sa bag-ong Cebu Coliseum.

Ang Baby Jaguars mipapas sa 13 puntos nilang alkansi sa first half ug dayon nag-agi og singko minutos nga ekstensyon sa wala pa tumbaha ang Cebu Eastern College (CEC) Blue Dragons, 70-62.

Alkansi sa iskor nga 19-32 sa nahibilin nga usa ka minuto sa ikaduhang kuwarter, ang Baby Jaguars milusad og madasigong resbak aron iduso ang duwa ngadto sa overtime, salamat sa tulo ka sagunson nga free throws ni Clyve Heinrich Antig nga nakapuwersa og 58-58 nga panagtabla sa pinal nga sayes segundos sa regulasyon.

Sa dugang nga oras, salida na tanan sa Baby Jaguars nga milabaw og 10 puntos, 70-60, sa layup ni Krstc Da Silva sa kapapusang 1:35 sa duwa. Si Da Silva maoy nangu sa Baby Jaguars uban ang 18 puntos, pito ka rebounds, tulo ka assists, tulo ka steals ug usa ka block.

Si Antig miamot og 16 puntos, siyam ka rebounds ug upat ka steals samtang si John Caresosa miamot og 14 puntos, lima ka rebounds, tulo ka assists ug usa ka steal. Sa sayo pa, ang Greywolves mikolapaso human miabante og 12 puntos, 40-28, sa sayong bahin sa ikatulong kuwarter apan nagsandig sa solido nilang opensa sa endgame aron pakagingon ang San Carlos School of Cebu Baby Warriors, 67-62. Si Daniel Cerilles Jr. mipupo og 17 puntos, unom ka rebounds ug tulo ka assists samtang si James Kennedy Plano mihimo og impresyon human mipupo og 12 puntos, 11 ka rebounds, duha ka assists, lima ka steals ug tulo ka blocks. Dako sab og naambag si Serger Rodriguez nga mitimbre og 11 puntos, upat ka rebounds, tulo ka assists ug usa ka steal alang sa mga Bosconians.