Hammerhead nanghawod sa ACL Season 3
CEBU, Philippines — Ang Team Hammerhead (UCMed) mipakaging sa VSMMC, 63-58, sa tinagakay nilang final match aron langkaton ang korona sa kampiyonato sa bag-ohay pang natapos nga Athletic Cebu League (ACL) Season 3 sa Sacred Heart Center Sports Club sa dalan D. Jakosalem, dakbayan sa Sugbo.
Si Jade Iñigo maoy nangu sa Hammerhead uban ang 17 puntos aron mamahimong Finals MVP.
Sila si Ralph Dy ug Dereck Manatad nagparamdam sab sa ilang presensiya human nagkumboya'g 15 puntos alang sa mananaog nga kampo.
Ang Hammerhead nabiyaan og 11 puntos, 12-23, human sa unang kuwarter aron miresbak pinaagi sa 16-6 rally aron pagsikit ngadto sa usa na lang ka lugas, 28-29, sa halftime.
Alkansi gihapon og tres puntos, 42-45, human sa tulo ka kuwarter, ang Hammerhead milusad og mainit nga opensiba, 21-13, sa katapusang hunat sa duwa aron patikalbongon ang VSMMC.
Si Dr. Ray Angelo Yap mikadlit og 12 puntos alang sa VSMMC samtang sila si Justin Oyao ug Robinson Yap nagkumbinar og 21 puntos sa pilderong kawsa.
Giorganisa ni Marion Delima, ang ikatulong edisyon sa ACL nahimong posible tungod sa suporta nilang Keith Ng, Cathy Diaz-Ng ug Dr. Doc Dilbert Monicit sa Surgtech, Reg Rodulfo, Gretchen Tan sa FastAds, MDS Team, Ronex Tolin Photography ug Badbeat Sportswear.
- Latest
