Desiderio Bayani sa UV Lancers

CEBU, Philippines — Si Paul Desiderio milansang og krusyal nga 3-pointer sa pinal nga tres segundos aron aswaton ang University of the Visayas (UV) Green Lancers ngadto sa kulbahinam nga daog batok sa University of Cebu (UC) Webmasters, 85-83, atol sa sangka tali sa mga kanhi All-Star players sa Cebu Cebu Schools Athletic Foundation, Inc. (CESAFI) niadtong Miyerkules sa gabii, Septiyembre 10, sa Cebu Coliseum.

Ubos sa pagtimon ni legendary coach Elmer "Boy" Cabahug, ang Lancers mikadlit sa nag-unang 18 puntos sa duwa dayon na ngadto sa pag-establisar og 26 puntos nga bentaha, 38-12, sa sayong bahin sa ikaduha kuwarter.

Apan ang Webmasters, nga nadasig sa abiba sa garbo nilang si PBA superstar June Mar Fajardo, hinayhinay nga nakagukod hangtud nga nailog pa nila ang labaw,  83-82, sa jump shot ni Luigi Gabisan sa katapusang 36 segundos.

Ang UC duna pa untay tsansa nga inaton ang ilang bentaha apan si playing coach Dondon Hontiveros nasipyat sa duha ka importante niyang free throws sa nahibilin nga 13 segundos sa duwa.

Dinhi na misalida si Desiderio pinaagi sa pagpasud sa hagpok kaayo niyang tres gikan sa maanindot nga assist ni Harold Cincoflores sa pinal nga tres segundos nga nakapalumpayat sa tibuok Lancers bench ug sa ilang mga fans sa tumang kalipay.

Si Desiderio, nga usa sa upat ka Lancers nga mirehistro og double figures, mitapos uban ang 10 puntos.

Si Emman Calo maoy nangu sa UV bitbit ang 14 puntos, unom ka rebounds, ug lima ka assists.

Mihimo sab og kasikas si Gayford Rodriguez uban ang 12 puntos ug unom ka rebounds ingon man si Jancork Cabahug miamot og 11 puntos, unom ka rebounds, ug upat ka assists.

Nagparamdam sab sa iyang presensiya si Arian Lao nga hapit maposte og double-double uban ang nuybe puntos ug 11 ka rebounds.

Si Gabisan mipupo og 24 puntos, unom ka rebounds ug duha ka assists samtang si Kelvin Juliane mihipos og 13 puntos, duha ka rebounds ug upat ka assists sa naparot nga Webmasters.