Mikee Mojdeh nagparamdam sa Asian Open

MANILA, Philippines — Hindi rin nagpaawat si Swim League Philippines-Behrouz Elite Swimming Team (SLP-BEST) standout Mikhael Jasper Mikee Mojdeh na kumana ng dalawang gintong medalya sa ikalawang araw ng 2025 Asian Open School Invitational (AOSI) Short Course Age Group Swimming Championship na ginaganap sa Assumption University Aquatic Center sa Bangkok, Thailand.

Humataw si Mojdeh ng gintong medalya sa boys’ 10-year 50m backstroke kung saan nagtala ito ng 37.76 segundo upang pataubin si Anand Badamsed ng Mongolia na nagkasya sa pilak tangan ang 37.83 segundo.

Magandang resbak ito ni Mojdeh laban kay Badamsed na tumalo sa kanya sa 200m IM event sa opening day noong Sabado.

Matatandaang nagkasya sa pilak si Mojdeh bunsod ng naitala nitong 2:54.90 habang nasikwat ni Badamsed ang ginto bitbit ang 2:54.06.

Hindi pa nagpaawat si Mojdeh na humirit pa ng ginto sa 100m butterfly sa bilis na 1:22.85 segundo para payukuin sina silver winner Changsanit Thanyakit ng Thailand (1:24.30) at bronze winner Thaw Annt Phohn ng Myanmar (1:28.08).

Nakatanso pa si Mojdeh sa 100m freestyle hawak ang personal best time na 1:13.26.

“It was tough to get a gold medal in freestyle because my rivals are super fast. But I’m happy with my times. I even got my personal best, even though there were tons of good swimmers my age. I was able to push myself to swim faster,” ani Mojdeh na pambato ng Immaculate Heart of Mary College-Parañaque.

Hihirit pa si Mojdeh ng gintong medalya sa mga nalalabing events nito — ang 100m backstroke, 100m IM, 50m butterfly at 200m freestyle.

“Thanks to my coaches, my team, and Swim League Philippines. I love competing here because those fast swimmers always make me step up my game,” dagdag ni Mojdeh.

Patuloy din ang pamamayagpag ng nakatatanda nitong kapatid na si Behrouz Mohammad Madi sa boys’ 14-year division kung saan nagtala na naman ito ng bagong rekord.

Inilabas ni Madi ang bagsik nito sa pagtarak ng 59.85 segundo para burahin ang 1:03.06 na dating marka ni Woraphakphng Rachatatevin ng Thailand sa 100m butterfly.

Ito ang ikatlong rekord ni Madi sa torneo matapos wasakin ang marka sa 200m IM (2:14.63) at 200m breaststroke (2:28.51) sa Day 1 ng kumpetisyon.

Nakaginto rin ang La Salle-Greenhills freshman na si Madi sa 100m breaststroke (1:08.71) para sa kanyang ikaapat na gintong medalya habang nakapilak ito sa 200m backstroke (2:17.87).

Nag-ambag ng gintong medalya si Kaidyn Brie Waskiewicz sa girls’ 12-year 200m backstroke kung saan nagsumite ito ng 2:42.71 habang pinamunuan nito ang relay team sa pagkopo ng pilak sa 200m freestyle relay.

Bahagi naman sina Leane Jewel Arellano at Marien Jade Arellano na naka-ginto sa girls’ 9-under 200m freestyle relay (2:51.33).

Nakasikwat pa si Tanjie Elise Waskiewicz ng pilak girls’ 16-year 50m breaststroke habang may pilak din si Aliyya Faine Mojdeh sa girls’ 9-year 200m freestyle relay at tanso naman si Elisa De Kam girls’ 14-year 200m backstroke.