Regalario biyaheng semis’
MANILA, Philippines — Pumapalag pa si billiards sensation Bernie Regalario matapos makapasok sa semifinals ng Zen Custom Cue and Yuan 8 Open na inilalaro sa Yuan 8 Club sa Shanghai, China.
Tanging ang 20-anyos na si Regalario na lamang ang Pinoy na sumasargo sa torneong may nakalaang $60,000 guaranteed prize kung saan $20,000 ang maisusubi ng magkakampeon.
Pinagulong muna ni Regalario, ang 2025 World 9-ball semifinalist, si Lu Hui-Chan ng Chineses Taipei, 10-5, bago inilaglag si Taiwanese Lin Ta-Li, 10-4, sa quarterfinals.
Subalit paniguradong dadaan sa butas ng karayom ang billiards sensation na si Regalario dahil makakalaban niya sa Last Four ang defending champion na si Ko Pin Yi ng Chinese Taipei.
Dinomina ni Yi si Naoyuki Oi ng Japan, 10-3, sa hangaring maipagtanggol ang suot niyang korona.
Hindi naman pinalad ang tatlo pang Pinoy na tumumbok sa Last 16.
Ito ay sina Marvin Asis, Michael Feliciana at Harry Vergara kaya solo na lang si Regalario sa quarterfinals.
Kailangang manalo pa ng dalawang matches si Regalario upang mahablot ang pinakamalaking titulo sa kanyang batang professional career.
Sa loser’s side gumapang si Regalario upang makapasok sa knockout stage na Round-of-32.
Hahamigin ng second placer ang $8,000, may $4,000 ang dalawang semifinalists, habang tig-$2,000 para sa apat na quarterfinalists.
Magtutumbukan din sa semis sina Felix Vogel ng Germany at Albert Januario ng Indonesia na ang mananalo ay posibleng labanan ni Regalario sa finals ng torneo.
- Latest
