Pacuribot, Codinera nanghawod sa CEPCA monthly

CEBU, Philippines — Sila si Joel Pacuribot ug Arena Grandmaster Kevin Codinera maoy naghari sa Agosto nga edisyon sa Cebu Executives and Professionals Chess Association (CEPCA) monthly tournament sa Robinsons Galleria Cebu.

Nagtabla sila Pacuribot ug Arena International Master Dennis Navales uban ang parehong 5.0 puntos apan si Pacuribot maoy misakmit sa Class A title kortesiya sa mas taas niyang tiebreaker. Si Eden Diano mipahiluna sa ikaduhang dapit bitbit ang 4.0 puntos. Sa Class B, si Codinera ang mibira sa korona uban ang 4.5 puntos.

Si Edwin Cablao mitapos nga ikaduha uban ang 4.0 puntos samtang si Nicanor Cuizon nalandig sa ikatulong puwesto uban ang 3.5 puntos.

Gawas sa ganting salapi, sila si Pacuribot ug Codinera nakaangkon sab og luna sa grand finals nga giulohan og "CEPCA Battle of Champions" karong Disiembre.

Sa laing bahin, sila si Cheryl Angot (female) ug Theon Cade Miranda (12 Under) maoy labing maayong partisipante sa tagsa-tagsa nila ka mga kategoriya.