UC gymnasts misidlak sa Malaysia

MANILA, Philippines —  Si Daniella Myrnn de la Pisa sa University of Cebu misakmit og gold medal ug duha ka bronze sa Vivace 4th Rhythmic Gymnastics International Competition didto sa Pesta Gim sa Kuala Lumpur, Malaysia ning bag-ohay pa lamang.

Ang kinamanghuran nga anak nilang kanhi University of the Visayas (UV) Green Lancer Randy Dela Pisa ug champion gymnast nga nahimong coach nga si Darlene Castañeda-de la Pisa padayong mihimo sa kaugalingon niyang                               pangan.   

Si De la Pisa naka-gold sa 10 Under rope event nga iyang gisukipan og duha ka bronze sa ball ug freehand.

Nagpakita siya og susamang talento ug katakos sa maguwang niyang si Daniela Reggie de la Pisa nga kasamtangang sakop sa Philippine team.

Laing UC gymnast nga Jahphrodite Baguio ang nagparamdam sab sa iyang presensiya pinaagi sa pagbira og tulo ka bronseng medalya sa hoop, ball, ug freehand sa U12_A division.

Laing tulo ka gymnasts nga gibansay-bansay ni coach Darlene ubos sa Ritmik Jimnastiks La Sugbo ang mihimo sab og impresyon didto sa Malaysia.

Si Alexa Noelle Samson sa Monterey School, Inc. milabni og silver sa rope ug duha ka bronze sa ball ug freehand sa U8_A age group.

Si Maria Alexandra Eunice Sevilla sa Sacred Heart School–Hijas de Jesus milangkat og tulo ka bronze sa hoop, ball, ug freehand sa U9_A class samtang si Julia Yzabelle Eugenio sa Asian College of Technology Integrated School mipugnit og tulo ka bronze sa rope, ball, ug freehand ubos sa U8 category.