Bantay milangkat sa WBF Asia Pacific title

CEBU, Philippines — Si Junibert Bantay mibuntog sa Hapon niyang kontra nga si Hiroki Miyamoto pinaagi sa unanimous decision aron langkaton ang korona sa World Boxing Foundation (WBF) Asia Pacific super featherweight division atol sa main event sa "Fist of Fury 8: Philippines vs Japan" fight card nga gipasiugdahan sa Chao Sy International Promotions niadtong Sabado, Agosto 16, didto sa Skyhall sa SM Seaside City.

Human sa walo ka hugna nga kumbati, ang 25-anyos nga si Bantay maoy mipatigbabaw sa scorecards sa tanang tulo ka mga judges sa iskor nga 78-74 duha ka higayon ug 79-73 aron sakmiton ang una niyang rehiyonal nga bakos.

Ang garbo sa Bukidnon migamit sa hait niyang counter-punching, solidong depensa, ug maanindot nga footwork aron dominahon ang mas dako ug mas taas nga bisitang Hapon ug inaton ang perpekto niyang rekord ngadto sa 9-0 uban ang 1KO. Si Miyamoto natagak sa 2-1 uban ang 2KOs.

Sa supporting main event, si Jemuel Aranas (7-2-1, 4KOs) sa Chao Sy Stable ug ang Hapon nga si Kiyoto Narukami (5-1-1, 2 KOs) sa ZIP/Sanman Gym nga nagbase dinhi sa Sugbo nagtabla human sa walo ka hugna nilang pagsinukliay og kumo.

Sa laing sangka alang sa titulo, ang na-injured nga si Vicente Unidos (4-2, 3KOs gipilde ni Philippine Youth bantamweight champion Kenneth Albino (7-3, 4KOs) pinaagi sa 3rd round TKO.

Sa ubang mga resulta, si Joperson Trazo (6-1-1, 2KOs) mipasurender ni Marlon Alejandro (6-8-2, 1KO) sa ikalimang hugna, si Brian Bustrillon mipukan ni Justine Lumanao pinaagi TKO, samtang si John Paul Sarigumba mibuntog ni Apolinario Cano pinaagi sa unanimous decision.