Centeno palaban sa ginto sa World Games
MANILA, Philippines — Isang karagdagang medalya ang maisasama sa kaban ng Team Philippines sa prestihiyosong 2025 World Games na ginaganap sa Chengdu, China.
Sigurado na ng pilak na medalya si dating World 10-Ball Championship winner Chezka Centeno matapos itong umentra sa gold-medal match ng women’s 10-ball event.
Inilampaso ng 26-anyos na si Centeno si Chines Shasha Lui sa semifinals sa iskor na 7-4 sa labang ginanap sa Civil Aviation Flight University of China - Tianfu Campus Gymnasium.
Puntirya ni Centeno na makasungkit ng gintong medalya sa pagsagupa nito sa isa pang Chinese bet na si Yu Han Miyerkules ng gabi.
Mapapalaban si Centeno dahil three-time world 9-ball champion si Han.
“I am happy to be here with a big opportunity to win the gold. In the finals, it is all about focus,” ani Centeno.
Ngunit hawak ni Centeno ang 1-0 bentahe laban kay Han dahil ito ang parehong player na tinalo nito sa finals ng World 10-Ball Championship noong 2023.
Aminado si Centeno na mahusay si Han na inaasahang makakakuha pa ng suporta mula sa crowd.
“She’s a good player and the fans will surely go out and support her. But I know I’m ready,” ani Centeno.
Nakapasok si Han sa finals nang payukuin nito si Ina Kaplan, 7-3, sa hiwalay na semis match.
Sa kasalukuyan, may isang pilak at isang tanso na ang Team Philippines.
Galing ang pilak kay Kaila Napolis sa ju-jitsu habang may tanso naman si Carlos Baylon sa wushu sanda.
Sa kabilang banda, aariba naman si Aislinn Yap sa sambo women’s combat -80-kilogram quarterfinals ngayong araw sa Jianyang Cultural and Sports Centre Gymnasium.
Si Yap ay rated No. 1 sa world rankings.
“We have a big chance. Aislinn’s fight will show the world the spirit of Filipino sambists,” ani Pilipinas Sambo Federation President Paolo Tancontian.
Sa individual men’s duathlon, sasabak sina Franklin Yee, Maynard Pecson at John Patrick Ciron sa Xinglong Lake Hubin Arena.
- Latest
