National tryouts ikinasa ng PAI
Para sa SEA Games-bound
MANILA, Philippines — Sa solidong suporta ng government at private sector ay magpapadala ang Philippine Aquatics Inc. (PAI) ng delegasyon sa lahat ng aquatic disciplines sa 33rd Southeast Asian Games sa Bangkok, Thailand sa Disyembre.
Sinabi ni PAI Secretary General Eric Buhain na ang pagdaraos ng national tryouts ay hindi lamang para sa swimming kundi pati na rin sa water polo at open-water events.
Ito ay bilang bahagi ng hangarin ng bansang muling magdomina sa regional meet.
Itinakda ang national swimming tryouts sa Agosto 22-24 sa Teofilo Yldefonso Swimming Center sa Rizal Memorial Sports Complex (RMSC) kasunod ang open-water swimming tryouts sa Agosto 30-31 sa Playa Tropical Resorts Hotel sa Barangay Victoria, Currimao, Ilocos Norte.
Todo-suporta ang PAI sa mga elite athletes para sa kanilang mga international training at high-level competitions.
Kasalukuyang nagsasanay si Olympian Kyla Sanchez sa Canada, habang nasa Melbourne sina SEA Games champions Xiandi Chua at Chloe Isleta.
Sasandal din si Buhain kina 2023 SEA Games gold medalist Tea Salvino, junior standouts Jasmine Mojdeh at Jamesray Mishael Ajido, veterans Jerard Jacinto, Filipino-American Gian Santos at Andria Eichler na parehong sumabak sa nakaraang World Championships sa Singapore.
- Latest
