Doc Janos gitudlo nga team physician sa UV Lancers

CEBU, Philippines —   Ang tinamod nga Sugbuanong orthopedic doctor nga si Janos Vizcayno Jr. gitudlo sports medicine team physician sa University of the Visayas (UV) Green Lancers basketball team.

Nadawat ni Vizcayno ang opisyal niyang appointment gikan ni UV Assistant Vice President for Finance and Administation Jose Miguel "J-Mi" Gullas atubangan sa presensiya nilang UV Athletic Director Dr. Chris Mejarito, head coach Gary Cortes, ug strength and conditioning coach Roger Justine Potot.

"Grateful to be part of the UV family," matud pa ni Vizcayno, nga naka-train sa St. Luke’s Medical Center Institute of Orthopedics and Sports Medicine ubos sa nabantog nga sports surgeon nga si Dr. Jose Raul Canlas ug mibaid pa sa iyang abilidad didto sa Tokyo Advance Orthopedics-Sports and Joint Center sa Japan.

"I was entrusted with this role because of my background in sports medicine and commitment to athlete care. I assure the team of my full support, professionalism, and dedication to keeping our players healthy, safe, and game-ready," dugang pa niya.

Si Doc Janos, nga adunay espesyalisasyon sa advanced shoulder surgery, sports medicine, ug adult hip and knee joint replacement, aktibo sa eksena sa Cebu sports diin siya nakasilbe sa nagkadaiyang mga liga sama sa Cebu Youth Basketball League (CYBL), Pilipinas VisMin Super Cup, ug FIBA 3x3 World Tour Cebu leg wala pay labot niini ang boluntaryo niyang serbisyo isip kabahin sa Medical Team sa dihang ang dakbayan sa Sugbo mi-host sa Palarong Pambansa sa miaging tuig.

Uban sa Lancers, ang 40-anyos nga si Vizcayno mipaambit nga ang nag-una niyang tumong mao ang pagpanalipod sa panglawas sa mga atleta, suportahan ang maayo nilang performance, ug giyahan sila sa ensaktong direksiyon aron makabalik og duwa kon ugaling ma-injured sila. "As the UV Green Lancers Sports Medicine Team Physician, my utmost concern is to ensure the players’ health and performance - from injury prevention and treatment to overall wellness and recovery support," dason pa ni       Vizcayno.

"I will provide prompt assessment and treatment of sports-related conditions, coordinate rehabilitation, and work closely with coaches, trainers, and support staff to prevent injuries before they happen."

Gipasalig ni Vizcayno nga ang team makalaom kaniya og klaro ug matinud-anon nga komunikasyon kabahin sa ilang medical findings ug recovery timelines ingon man rekomendasyon nga nakabase sa mga ebidensiya diin ang kaayuhan sa mga atleta maoy nag-una nilang konsiderasyon.

"Our shared goal is simple: to keep every member of this team healthy, competitive, and ready to excel, on and off the field," panapos pa ni Vizcayno.