Batch 2012, 2015 abante sa SHAABAA division finals

CEBU, Philippines — Ang Harley Davidson Batch 2012 ug ang Imperial House of Furniture Batch 2015 mikumpleto og 2-0 sweep sa ilang mga karibal aron pag-abante sa division finals sa Sacred Heart Ateneo Alumni Basketball Athletic Association (SHAABAA) Season 28 didto sa Sacred Heart School-Ateneo de Cebu (SHS-AdC) Magis Eagles sa Barangay Canduman, dakbayan sa Mandaue.

Sa Division B, si Adven Jess Diputado mipaulbo og 38 puntos uban ang siyam ka rebounds, upat ka assists, duha ka steals ug usa ka block sa dihang gipalagpot sa Batch 2012 ang '04 The Win Batch 2004, 91-90.

Si Julius Cadavis miposte og double-double nga 12 puntos ug 10 ka rebounds samtang sila si Mavii Suarez ug Kyle Dumon nagkumbinar og 21 puntos, 12 ka rebounds ug upat ka assists aron tabangan ang Batch 2012 paglukat og ticket sa kampiyonato.

Maghuwat usa sila kon kinsay ilang makaharong sa finals gumikan kay ang Insular Square Batch 2005 naka-angkon pa og laing kinabuhi human gibaslan ang ZLREJ Trading and Construction Batch 2010, 56-41.

Si Elddie Cabahug maoy nangu sa Batch 2005 uban ang 26 puntos, tulo ka rebounds ug tulo ka assists. Si Daryle Tan midonar og 16 puntos, walo ka rebounds ug duha ka assists.

Sa Division C, si Felixberto Jaboneta miharos og 23 puntos, siyam ka rebounds, lima ka assists ug tulo ka steals sa dihang gitagak sa Batch 2015 ang FADI Batch 2021, 79-73.

Si Anton Bennett Chua miposa og upat ka 3-pointers sa iyang 15 puntos uban ang upat ka rebounds samtang sila sila Lorenz Miguel Otero ug Chaz Cokaliong nagkumboya'g 21 puntos, 10 ka rebounds ug upat ka assists alang sa Batch 2015.

Sa laing resulta, si Eroll Pastor mirehistro og double-double nga 20 puntos ug 10 ka rebounds sa dihang gipakaging sa Forex Xchange Batch 2018 ang Nest Worskspaces Batch 2013, 78-68, aron pagtikang ngadto sa usa na lang ka daog gikan sa finals.

Si Pastor nakakuha og dakong suporta gikan ni Patrick Yu uban ang 17 puntos ug lima ka rebounds ingon man ni Benedict Andre Chua, nga mihipos og 16 puntos ug duha ka rebounds.