Ancajas milupig ni Casero

CEBU, Philippines — Ang Pinoyng' kanhi world champion nga si Jerwin "Pretty Boy" Ancajas nagmadaogon sa pag-away niya og balik didto sa Amerika.

Kini human gipukan ni Ancajas si Ruben Casero pinaagi sa majority decision human sa walo ka hugna nilang binukbukay ubos sa super bantamweight division niadtong Domingo didto sa Thunder Studios sa Long Beach, California.

Si Ancajas, nga kanhi naghari sa IBF super flyweight decision, migamit sa hagpok niyang mga jabs ug hait nga kombinasyon aron labnihon ang ikatulo niyang sagunson nga daog.

Samtang ang usa ka judge misumite og tabla nga iskor, 76-76, ang laing duha ka judges parehong mitali og 80-72 pabor ni Anjacas.

Ang 33-anyos nga si Ancajas nagkupot na og 37-4-2 win-loss-draw rekord uban ang 24KOs human mikulit sa una niyang daog didto sa US sukad gipakatikangkang niya si Wilner Soto sa ikalimang hugna didto sa Minneapolis niadtong 2023.

Labaw sa tanan, si Ancajas mibuhi sa iyang pangandoy nga mamahimong world champion og usab, ning higayona sa mas bug-at nga junior featherweight category.

Sa iyang bahin, si Casero nahagsa sa 13-5 uban ang 5KOs.