Ancajas sasagupa kay Casero

MANILA, Philippines — Lalabanan ni dating world super flyweight cham­pion Jerwin Ancajas si Ruben Dario Casero ng Uruguay sa isang eight-round, non-title super bantamweight fight ngayon (Manila time) sa Thunder Studios sa Long Beach, California.

Dalawang sunod na panalo ang sinuntok ng 33-anyos na si Ancajas (36-4-2, 24 KOs) bago harapin ang 32-anyos na si Casero (13-4-0, 5 KOs).

Tinalo ng tubong Pa­nalo, Davao del Norte si Thai fighter Sukpraserd Ponpitak via disqualification at noong Setyembre ng 2024 at ang kababayang si Richie Mepranum mula sa isang second round knockout noong Enero.

Nauna siyang minalas kay World Boxing Association (WBA) bantamweight king Takuma Inoue noong Pebrero 24, 2024 kasunod ang kanyang two-fight winning run.

Si Ancajas ay dating International Boxing Federation (IBF) super flyweight titlist bago umakyat sa super bantamweight division.

Hindi naisama si Ancajas sa undercard ng suntukan nina Manny Pacquiao at Mario Barrios noong H­ulyo 19 sa MGM Grand sa Las Vegas, Nevada.

Hindi ito inaprubahan ng Nevada State Athletic Commission.

Sa nasabing undercard ay tinalo ni Mark Magsayo (28-2-0, 18 KOs) si Mexican Jorge Mata (21-3-2, 13 KOs) via unanimous decision sa kanilang 10-round non-title super featherweight duel.

Pinatumba ni Eumir Felix Marcial (6-0-0, 4 KOs) si American Bernard Joseph (11-3-1, 5 KOs) sa third round ng eight-round middleweight bout.