Visayas Kickboxing Championship mosikad na

CEBU, Philippines — Ang labing unang Visayas Kickboxing Championship mo-arangkada na karong adlawa (Biyernes, Agosto 1) diha sa SM Seaside City.

Adunay pagtugot sa Samahang Kickboxing ng Pilipinas (SKP), ang giila nga National Sports Association (NSA) alang sa kickboxing sa Philippine Sports Commission (PSC) ug Philippine Olympic Committee (POC), ang tulo ka adlaw nga kumbati magsilbeng qualifying event alang sa National Kickboxing Championship sud ning tuiga.

Ang torneyo naglangkob og duha ka disiplina, ang kicklight ug point fighting.

Mga batan-ong atleta nga nag-edad gikan sa siyete anyos pataas ang mosalmot sa kompetisyon nga seguro puno sa aksiyon.

Giorganisa kini nilang Master Benigno "Ekin" Caniga ug John Ian Nisnisan inabagan sa lokal nga kagamhanan sa dakbayan sa Sugbo, Cebu City Sports Commission, ug Department of Education (DepEd)-Cebu City Division.

Si SKP Technical Director Roselyn Hung tuyo nga moanhi aron abibahan ang kalihukan kauban ang assistant niyang si Bryan Olod.