Makigbinukbukay na ni Barrios karong adlawa sa Las Vegas

Laing kasaysayan tuyo ni Pacquiao

CEBU, Philippines —  Migawas gikan sa upat ka tuig nga pagkaretirado, si Manny Pacquiao  (62-8-2, 39KOs) mokatkat og balik sa ring aron sangkaon si World Boxing Council welterweight champion Mario Barrios (29-2-1, 18KOs) karong adlawa (Domingo, Hulyo 20 oras dinhi sa Pilipinas) didto sa MGM Grand Garden Arena sa Las Vegas, Nevada.

"I'm so happy I'm back because boxing is my passion and I missed boxing," matud pa ni Pacquiao human makuha ang ensaktong timbang atol sa official weigh-in kagahapong adlawa.

Sa edad nga 46 anyos, daghan ang nabalaka sa desisyon ni Pacquiao nga mobalik og away kay lagi nahuman na ang iyang panahon ug wala na siyay angay nga pamatud-an pa apan kining tanan gisalikway sa bugtong eight-division world champion nga masaligon kaayo nga duna pa siyay ikabuga.

Ang labing importante alang ni Pacquiao mao nga gisuportaan siya sa iyang pamilya sa iyang gibuhat ilabi na kay ilang nakita nga wala pa mobahar ang iyang abilidad.

"I'm thankful for their concern," matud pa ni Pacquiao, nga modawat og $10 million ning maong away. "But the people who really concern me, is my family. My family saw how I move, saw how I train, saw my my body condition. They support me because they can see the old Pacquiao style."

Kon ugaling modaog, si Pacquiao mokulit og laing kasaysayan sa masilakon niyang karera. Gawas nga mamahimong labing tiguwang nga welterweight champion, kuptan sab niya ang dungog isip labing unang aktibong Hall of Famer nga naghari isip world champion.

Moabli sab kini sa mas dakong oportunidad alang ni Pacquiao sa umaabot apil na ang usa ka sangka batok ni Geronta Davis ug ang posibleng rematch nilang Floyd Mayweather, Jr.

Apan nagbarog sa iyang dalan ang mas bata, mas dako ug mas aktibo nga si Barrios, nga gutom ug determinado nga modaog. Taas man tuod siya og respeto ni Pacquiao apan ang 30-anyos nga si Barrios miinsister nga misaop na ang karera sa giidolong Pinoy ug iya na sab nga panahon karon aron mosidlak.

"I'm approaching this the same way I have all my other fights - I treat it as just another title defense," dason pa ni Barrios. "Manny has accomplished so much, but it's my time now."