Beermen 3-1 ang tirada, Tropa buot makatabla

CEBU, Philippines —  Managlahi ang tumong sa San Miguel Beermen ug TNT Tropang 5G sa dihang magbangga na sab sila sa Game 4 sa best-of-seven PBA Season 49 Philippine Cup Finals karong adlawa (Domingo, Hulyo 20) didto sa Smart Araneta Coliseum sa Quezon City.

Magsugod ang ilang engkwentro sa alas 7:30 sa gabii.

Ang Beermen mao na karon ang nagkontrola sa serye human gisagunsonan nila og pilde ang Tropa.

Ang TNT mikulit og kontrobersiyal nga daog sa Game 1, 99-96.

Miresbak hinoon dayon ang Beermen ug giusban pa og parot ang Tropa, 108-88, sa Game 3 niadtong Biyernes sa gabii, Hulyo 18, aron ilogon ang labaw sa race-to-4 nilang duwelo.

Buot sa Beermen nga inaton ang ilang bentaha ngadto sa 3-1, butang nga angayan likayan sa Tropa.

Kay kon ugaling mahagba sila sa ikatulong sunod-sunod nga higayon, hayan nga hanap pa's dyes panas nga makab-ot sa TNT ang ilang damgo nga maka-Grand Slam ning season.