Beal mibiya sa Suns, makig-uban sa Clippers

CEBU, Philippines — Si All-Star guard Bradley Beal miuyon sa usa ka contract buyout sa Phoenix Suns nga naghatag kaniya og oportunidad nga makig-uban sa Los Angeles Clippers sa sunod nga NBA season.

Ang 32-anyos nga Amerikano maoy 3rd overall pick sa Washington Wizards niadtong 2012 NBA Draft. Gi-trade siya ngadto sa Phoenix niadtong 2023 apan nanlimbasug sa miaging duha ka seasons uban sa Suns nga miresulta ngadto sa iyang pagbiya.

Human maplantsa ang iyang mga waivers, si Beal nagplano nga mopirma og duha ka tuig nga kontrata nga mobalor og $11 million uban sa Clippers, sigun pa sa iyang ahente ngadto sa ESPN ug Arizona Republic.

Sa miaging bulan, ang Suns mi-trade sab ni star forward Kevin Durant ngadto sa Houston Rockets sa makapakurat nga pagbinayloay og players nga naglambigit og pito ka teams.   

Si Beal gihamok og injury sa miaging duha ka tuig sa Suns diin siya nakaduwa og 53 lamang ka duwa matag season.

Sa miaging season, si Beal mi-average og 17.0 puntos, 3.7 assists, 3.3 rebounds ug 1.1 steals matag duwa.   

Sa iyang pagtapon unya sa LA Clippers, makauban ni Beal sila si James Harden, Kawhi Leonard ug Brook Lopez.