Candon, PNVF pinalakas ang ‘volleyball tourism’

MANILA, Philippines —  Inihayag kahapon ni Candon City Mayor Eric Singson ang kanilang pamamahala sa Asian Volleyball Confederation (AVC) Women’s Nations Cup  sa Hunyo ng susunod na taon.

Ito ay dahil na rin sa matagumpay nilang pa­nga­ngasiwa sa 2025 Southeast Asian Volleyball League sa Candon City Arena.

Ang 2025 SEA Volleyball League, ang top-flight regional volleyball competition, ay ang unang international sporting event na idinaos sa Candon City Arena.

“Our people here enjoy the matches a lot,” wika ni Singson sa isang press conference kasama si Phi­lippine National Volleyball Federation president Ramon “Tats” Suzara sa Hotel Van Gogh Candon.

Pinasalamatan ni Suzara, pangulo rin ng AVC, ang pagsuporta ni Singson sa inisyatibo ng national at continental federation na palakasin ang volleyball tourism.

“There are tourist packa­ges now being promoted. Imagine fans from other countries coming to watch the FIVB Volleyball Men’s World Championship,” ani Suzara. “There’s a lot of interest from other countries.”

Mula sa limang bansa, iho-host ng Candon City ang 12 bansa sa continental level sa susunod na taon.

Nakikipagtulungan ang Candon City sa PNVF para sa hosting ng isang training camp ng Alas Pilipinas na isasabak sa FIVB Volleyball Men’s World Championships na naka­takda sa Setyembre 12 hanggang 28 sa Smart Araneta Coliseum at Mall of Asia Arenas.