Anthony Davis gi-operahan ang mata

CEBU, Philippines — Gi-operahan ang tuo nga mata ni Anthony Davis sa Dallas Mavericks aron ayuhon ang depekto sa iyang retina.

Sigun sa taho sa The Dallas Morning News ug ESPN,  makabalik ra hinoon dayon si Davis alang sa pagsugod sa ilang training camp sa dili pa mosikad ang NBA 2025-26 season.

Mao kini ang unang pre-season ni Davis uban sa Mavs. Naabot siya sa Dallas sa makapakurat nga mid-season trade nga naghatud ni Slovenian superstar Luka Doncic ngadto sa Los Angeles Lakers.

Si Davis mikuha og atensiyon sa iyang debut sa Dallas niadtong Pebrero diin siya miharos og 26 puntos, pito ka assists ug tulo ka blocks sa wala siya mibiya sa duwa kay na-injured.

Ang 10-time All-Star nakapalta og unom ka semana. Sa iyang pagbalik, iyang gitabangan ang Mavs nga makasud sa play-in tournament apan gitagak sila sa Memphis Grizzlies.

Mahinungdanon ang presensiya ni Davis sunod season ilabi na kay si Kyrie Irving wala pay klaro kon kanus-a makabalik kay dunay angol sa wala niining tuhod. Gawas ni Davis, saligan sab sa Mavs ang bag-ong kaplag nilang talento nga si Cooper Flagg,  ang No.1 overall pick sa 2025 NBA Draft niadto lamang miaging bulan.