Dave Peñalosa milangkat sa WBF Silver Lightweight title

CEBU, Philippines — Ang garbo sa Sugbo nga si Dave “The Hunter” Peñalosa mibuntog sa bisitang Tsinoy nga si Weiyi Jiang pinaagi sa unanimous decision aron sakmiton ang World Boxing Foundation (WBF) Silver lightweight belt atol sa main event sa "Fist of Fury VII" nga gipasiugdahan sa Chao Sy International Promotions niadtong Sabado sa gabii, Hunyo 28, didto sa Tinago Sports Complex sa dakbayan sa Sugbo.

Human sa walo ka hugna nga binukbukay, ang mga judges nga sila si Rolando Mendoza, Michael Espinosa ug Romar Embodo misumite og parehong iskor nga 77-75 pabor ni Peñalosa.

Ang anak ni kanhi two-division world champion Dodie Boy Peñalosa miinat sa iyang rekord ngadto sa 20-1 uban ang 12KOs human miposte sa ikatulo niyang sagunson nga daog sukad sa iyang pagbalik gikan sa duha ka tuig nga way kisaw.

Si Jiang natagak sa 2-2 uban ang 1KOs apan nakuha ang respeto sa mga Sugbuanong fans tungod sa gipakita niyang katakos ug kaisog samtang nakigsinukmagay sa teritoryo sa iyang kaaway.

Sa supporting main event, ang kababayan ni Jiang nga si Tuohatasen Sailibieke mipatigbabaw batok ni Vicente Unidos sa Chao Sy Stable pinaagi sa split decision sa kulbahinam nga sangka tali sa way pildeng mga boksidor.

Ang duha ka judges mitali og 75-74 alang ni Sailibieke apan ang ikatulong judge mikadlit og 76-74 alang ni Unidos hinungdan sa split decision.

Si Sailibieke nagkupot na karon og 6-0 nga baraha uban ang 3KOs samtang si Unidos nahagsa sa 4-1 uban ang 3KOs.

Sa laing engkwentro, si Jefre Jimenez (5-0, 2KOs) mipukan ni Marlon Alejandro (6-8-2, 1KO) pinaagi sa unanimous decision aton labnihon ang Philippine Boxing Federation (PBF) light flyweight title. Ang opisyal nga mga iskor mao ang 77-75, 78-74 ug 78-74.

Sa laing bahin, si Jimuel Aranas (7-2, 4KOs) midaog pinaagi sa 5th round TKO batok ni Anthony Gilbuela (8-8-3, 2KOs) sa Big Yellow Gym sa kontrobersiyal nga resulta kay alang sa trainer ni Gilbuela nga si Christopher “Pingping” Tepora sayo ra kaayo ang pagka-undang ni reperi Raffy Osumo ang away.