Donaire tagumpay sa comeback fight
MANILA, Philippines — Walang bahid ng pangangalawang si Nonito ‘The Filipino Flash’ Donaire na tagumpay sa kanyang pagbabalik-aksyon.
Hindi mabakas ang anumang pagbagal nang gapiin ni Donaire si Andres Campos ng Chile via technical decision upang mahablot ang World Boxing Association (WBA) interim bantamweight belt kahapon sa Casino Buenos Aires sa Buenos Aires, Argentina.
Tinamaan ng headbutt si Donaire dahilan para magkasugat ito at patuloy ang pagdaloy ng dugo sa kanyang kanang mata sa ninth round.
Kaya naman nagpasya ang referee na itigil na lamang ang laban.
Para malaman ang desisyon, bumase ang mga hurado sa scorecards.
Lamang si Donaire sa tatlong mga hurado kung saan nakakuha ito ng 87-84, 87-84 at 88-83 puntos para makuha ang technical decision win.
Umangat si Donaire sa 43-8 rekord tampok ang 28 knockouts habang bagsak naman si Campos sa 17-2-1.
Mas bata ng di hamak si Campos na nasa 28-anyos lamang kumpara kay Donaire na nasa 42-anyos na.
Subalit hindi ito naging hadlang sa Pinoy champion para makuha ang panalo dahil naging armas nito ang kanyang malalim na karanasan.
Ito ang unang panalo ni Donaire sapul noong kanyang huling laban.
Matatandaang natalo si Donaire kay undisputed champion Naoya Inoue ng Japan noong 2022 kung saan naitarak ng Japanese ang second round knockout win.
Hindi rin pinalad si Donaire nang makaharap nito si Mexican Alejandro Santiago na nanalo via unanimous decision noon namang 2023.
Inaabangan na ni Donaire ang susunod na makakasagupa nito.
Ang mananalo sa pagitan nina WBA bantamweight champion Antonio Vargas ng Amerika at Daigo Higa ng Japan sa Hulyo 30 ang haharapin ni Donaire sa kanyang sunod na laban.
- Latest
