NLEX garantisadong twice-to-beat sa PBA playoffs

CEBU, Philippines —  Ang NLEX Road Warriors mipiog sa Magnolia Hotshots, 107-99, niadtong Biyenes sa gabii didto sa Ninoy Aquino Stadium sa kaulohan aron pag-angkon og twice-to-beat advantage sa umaabot PBA Philippine Cup quarterfinals.

Sila si Robert Bolick, Xyrus Torres ug Brandon Ramirez maoy nangu sa dalaygong pagbalitok sa NLEX human sila malubong og 19 puntos sa first half. Ang Road Warriors mikastigo sa Hotshots, 29-14, sa ikaduhang kuwarter ug dayon, 36-24, sa ikatulong kuwarter aron sakmiton ang ikawalo nilang daog nga nagseguro kanila og luna sa Top 4 nga dunay twice-to-beat nga insentibo sa quarterfinals.

Si Bolick mikadlit og 25 puntos samtang si Torres ug Ramirez nagkumboya'g 40 puntos alang sa NLEX, nga miilog sa liderato sa liga bitbit ang 8-2 rekord samtang gitagak ang Magnolia sa ikaduhang puwesto uban ang 7-3 nga baraha.

Bisan og napilde, ang Hotshots duna pay tsansa nga makakuha og twice-to-beat bonus. Ila kining makab-ot kon ilang pildihon ang TNT Tropang 5G karong Hunyo 13.

Apan angayan silang mangandam sa usa ka dakong gubat gumikan kay buhi pa ang paglaum sa TNT nga makasud sa Top 4 human gilampaso sa Tropang 5G ang Blackwater, 108-82, luyo sa mainit nga mga kamot ni Simon Enciso.

Si Enciso, nga maoy gipiyalan sa backcourt sa TNT samtang nangayayay sila si Jayson Castro ug Rey Nambatac, miposa og unom ka 3-pointers sa iyang 19 puntos. Ang duha niya ka tres maoy naggatong sa nagkayong 18-6 rally sa ikaduhang kuwarter hinungdan nga nakontrola sa TNT ang duwa sa hingpit.

Sa kinatibuk-an, ang TNT milasang og 16 ka tres.

Sila si Kelly Williams ug Calvin Oftana nagkubminar og 29 puntos alang sa Tropang 5G nga nagtabla karon uban ang Barangay Ginebra ug Rain or Shine sa ikaupat nga dapit bitbit ang parehong 6-3 nga marka.