Batch 2018, 2015 2-0 na sa SHAABAA Season 28
CEBU, Philippines — Ang Xchange Forex Batch 2008 ug Imperial House of Furniture Batch 2015 misakmit og laing daog aron saw-an ang liderato sa Division C bitbit ang managsamang 2-0 rekords sa Sacred Heart Ateneo Alumni Basketball Association (SHAABAA) Season 28 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Ang Batch 2018 milusad og balanseng opensiba aron ilampornas ang BYD Batch 2020, 85-54.
Si Ian Clark Apostol maoy nangu sa Batch 2018 uban ang 15 puntos ug tulo ka rebounds samtang si Juliano Yusingco way sipyat sa pito niya ka itsa aron pagkadlit og 14 points nga iyang gisukipan og unom ka rebounds ug tulo ka assists.
Si Lyder Kent Canieso mitali og 12 puntos ug lima ka rebounds, si Joshua Vincent Mah mihipos og 11 puntos, unom ka rebounds ug six assists samtang si Benedict Andre Chua miposte og double-double nga 10 puntos ug 15 ka rebounds nga iyang gipalamanan og upat ka assists, duha ka steals ug usa ka block alang sa Batch 2018, nga sa usa ka higayon naglabaw og 33 puntos, 81-48.
Sa laing duwa, si Anton Bennett Chua mihipos og 16 puntos, unom ka rebounds ug usa ka assist samtang si Lorenzo Miguel Ortero miamot og 13 puntos, tulo ka rebounds, upat ka assists, duha ka steals ug usa ka block aron ituboy ang Batch 2015 ngadto sa 70-61 nga pagpakaging sa Rufrance LPG Batch 2025.
Kontrolado kaayo sa Batch 2015 nga duwa human sila mi-establisar og 17-puntos nga bentaha, 48-31, padung sa pinal nga 10 minutos.
Sa laing bahin, si Rey Marcus Fuentes mitagak og 19 puntos, walo ka rebounds ug usa ka assist sa dihang gimakmak sa FADI 2021 ang Kaway Batch 2023, 77-61, alang sa una nilang daog.
Mitampo si Virgil Maynard Uy og 15 puntos ug lima ka assists samtang si Tracy Carl Dadang mirehistro og double-double nga 12 puntos ug 11 ka rebounds uban ang duha ka assists alang sa Batch 2021, nga milusad og bangis nga ataki, 25-7, sa ikaduhang kuwarter aron bughaon ang Batch 2023.
- Latest
