Canino babandera sa DLSU kontra sa NU sa Finals
MANILA, Philippines — Rarampa sa UAAP Finals ang De La Salle University na dala ang determinasyong masilo at maagaw ang korona sa defending champions National University.
Magsisimula ang Game One ng UAAP Season 87 women’s volleyball best-of-three finals sa Mayo 11 sa Smart Araneta Coliseum.
Taas-noong maglalaro si Lady Spikers team captain Angel Anne Canino at nais nitong ipakita sa kanyang mga teammates upang madala rin nila sa paghahamon sa Lady Bulldogs.
“I start with pride. I think, pinakaimportante din talaga na papuntang Finals, kailangan sa mga players ng La Salle ‘yung pride dala- dala nila,” sabi ng 21-anyos na si Canino.
Ayon pa sa dating Rookie-MVP, gusto rin niyang maipagpatuloy ang pagiging champion coach ni Ramil De Jesus.
“Part of the legacy din ni Coach Ramil ‘yon, eh—na nabuo na over the years na naging coach si Coach Ramil. Isa rin ‘yung pagiging Lady Spikers, ‘yung tinatawag na Lady Spikers, ‘yung value ng pagiging Lady Spikers.” dagdag ni Canino.
Nakapagtala na si De Jesus ng 12 UAAP championships para sa La Salle sa kanyang 21st Finals appearance ngayong season.
Bitbit ng Lady Spikers ang ‘twice-to-beat’ advantage sa semifinals matapos ang No. 2 seeding nila sa double round robin.
Tinalo nila sa Final Four ang No. 3 University of Sto. Tomas 25-22, 11-25, 25-21, 25-21, noong Sabado.
Bumida si Canino sa kanyang 19 points katuwang sina Amie Provido at Shevana Maria Nicola Laput may 15 at 14 markers, ayon sa pagkakasunod.
Sinibak naman ng NU ang FEU, 20-25, 22-24, 25-23, 25-14, 17-15, sa Final Four.
- Latest
