Tres ni Brunson nagpasok sa Knicks sa semis
DETROIT - Isinalpak ni Jalen Brunson ang isang game-winning three-pointer sa huling 4.3 segundo sa 116-113 pag-eskapo ng New York Knicks sa Pistons sa Game 6 at itiklop ang kanilang Eastern Conference first-round series.
Tumapos si Brunson na may 40 points para gabayan ang New York Knicks sa 4-2 pagligpit sa Detroit papasok sa semifinals kung saan nila makakatapat ang nagdedepensang Boston Celtics.
“I stay poised and I rely on the trust and composure my teammates give me,” sabi ni Brunson sa pagligtas niya sa Knicks.
Hindi naman nakatira si Malik Beasley para sana maitabla ang Pistons patungo sa overtime.
Nagdagdag si Mikal Bridges ng 25 points at may 22 markers si OG Anunoby para sa New York na nakahugot din kay Karl-Anthony Towns ng 10 points at 15 rebounds.
Humakot si Cade Cunningham ng 23 points, 8 assists at 7 rebounds para pamunuan ang nasibak na Detroit.
Naimintis ni Cunningham ang kanyang layup sa posesyon ng Pistons sa huling 22 segundo kung saan tabla ang laro sa 113-113.
Kasunod nito ay ang crossover ni Brunson at triple laban sa depensa ni Ausar Thompson para sa paglusot ng Knicks.
Sa Inglewood, California, umiskor sina James Harden at Kawhi Leonard ng tig-27 points para sa 111-105 pagdaig ng Los Angeles Clippers sa Denver Nuggets sa Game 6 at itabla sa 3-3 ang kanilang serye.
Nakatakda ang Game 7 sa Denver.
Nagdagdag si Norman Powell ng 24 points para sa pagbagon ng Clippers mula sa dalawang dikit na kabiguan sa Nuggets sa Games 4 at 5.
- Latest
