PRISAA National Games: UC Webmasters miabante sa quarterfinals

CEBU, Philippines — Ang University of Cebu (UC) Webmasters mikumpleto og 3-0 sweep sa eliminasyon uban ang 71-42 nga paglampaso sa St. Joseph's College sa Maasin City aron pagtuboy sa Central Visayas ngadto sa men's basketball quarterfinals sa 2025 Private Schools Athletic Association (PRISAA) National Games kagahapong adlawa (Miyerkules, Abril 9) didto sa University of Saint Louis Tuguegarao (USLT) Gym sa Cagayan Province.

Labaw lamang ang Webmasters og kuwatro puntos, 16-12, human sa unang bahin sa duwa apan mikulata sa ilang karibal gikan sa Eastern Visayas sa sunod nga duha ka kuwarter aron pag-establisar og komportableng 55-37 nga bentaha padung sa katapusang 10 minutos.

Giposasan dayon sa UC ang mga Maasinhon ngadto lamang  sa singko puntos sa pinal nga kuwarter samtang sila mi-iskor og 16 puntos aron pagposte og 29 puntos nga demolisyon.

Tungod niini, ang Webmasters miabante sa quarterfinals batok sa Nothern Mindanao (Region 10) sa alas 10:30 sa buntag karong adlawa (Huybes, Abril 10).