AVC Beach Tour dinomina ng Australia
MANILA, Philippines — Dinomina ng Australia ang men’s division ng Rebisco Asian Volleyball Confederation (AVC) Beach Tour Second Nuvali Open na ginanap sa world-class Nuvali Sand Courts sa Santa Rosa, Laguna.
Pinataob nina Australians Paul Burnett at Luke Ryan ang kababayang sina Ben Hood at Oliver Merritt sa all-Australian gold medal match sa iskor na 21-13, 21-18.
Naibulsa naman nina reigning Asian Seniors champions D’artagnan Potts at Jack Pearse na taga Australia din, ang tanso matapos iselyo ang 20-22, 21-19, 20-18 panalo laban kina Iranians Amerali Ghalehnovi at Bahman Salemiinjehboroun.
“We’re really proud of this and really happy because it’s very important for us for the World Championships at the end of the year to do well in these Asian Tour events,” ani Burnett.
Magandang panalo ito para sa Australia na siyang magiging host ng 2025 FIVB Beach Volleyball World Championships sa Adelaide sa Nobyembre 14 hanggang 23.
Kasunod ito ng 2025 FIVB Men’s Volleyball World Championship na gaganapin naman sa Pilipinas sa September 12 hanggang 28.
Naibulsa ng kampeon ang $2500 habang ang runners-up ay nag-uwi ng $2000 at $1500 naman para sa bronze winners.
Wagi rin ang Australia ng gold sa women’s division kung saan tinalo nina Stefanie Fejes at Jasmine Fleming sina New Zealand bets Shaunna Polley at Olivia MacDonald, 21-13, 13-21, 17-15, sa finals.
Wagi rin ng tanso ang Aussies mula kina Lizzie Alchin at Georgia Johnson na nanalo kina Japan spikers Asami Shiba at Reika Murakami, 21-17, 17-21, 11-15.
- Latest
