Nagrambol sa NBA gipangsilotan
CEBU, Philippines — Gipangsilotan sa NBA ang pipila ka indibidwal nga may kalambigitan sa nahitabong rambol tali sa Minnesota Timberwolves ug Detroit Pistons niadtong Lunes didto sa Target Center sa Minneapolis, Minnesota. Ang forward sa Pistons nga si Isaiah Stewart gipahamtangan og duha ka duwa nga suspensiyon samtang laing upat ka players ang gipangsuspenso.
Si Stewart maoy nadakdakan sa labing bug-at nga silot tungod kay siya man ang nagpasilaob sa mainit nang daan sa komprontasyon sa korte.
Gisuspenso sab og tagsa ka duwa sila si Ron Holland II ug Marcus Sasser sa Pistons ug Naz Reid ug Donte DiVincenzo sa Wolves.
Ang kagubot miulbo sa dihang si Holland gitawgan og defensive foul batok ni Reid sa oras nga 8:36 sa ikaduhang kuwarter.
Si Reid mitulisok ni Holland sa gihimo niining pagbangga kaniya nga miresulta ngadto sa lamok-lamok diin naapil pa gani ang coaching staff sa duha ka kampo.
- Latest
