Mojdeh sasabak sa Singapore swimfest
MANILA, Philippines — Magpapasiklab si national pool member Micaela Jasmine Mojdeh sa prestihiyosong 55th Singapore National Age Group Swimming Championships na magsisimula ngayong araw sa OCBC Aquatic Centre sa Singapore.
Sasabak si Mojdeh sa limang events sa women’s division kung saan mapapalaban ito sa matitikas na tankers mula sa iba’t ibang bansa gaya ng powerhouse Japan at host Singapore.
Magtatangka ang 18-anyos na pambato ng Behrouz Elite Swimming Team sa 400m Individual Medley, 50m butterfly, 200m butterfly, 100m butterfly at 200m Individual Medley.
Nasa seniors division na si Mojdeh matapos ang kanyang maningning na kampanya sa juniors class.
Matatandaang nakapagpartisipa na ito sa dalawang edisyon ng World Junior Swimming Championships kung saan umabot ito sa semifinals noong 2022 edisyon sa Lima, Peru.
Kaliwa’t kanan din ang mga nahakot nitong gintong medalya sa mga regional competitions at invitational meets sa France, Australia, South Africa, United States, United Arab Emirates, Japan, China, Taiwan, Qatar at iba pang bansa sa Southeast Asia.
Isa sa mga target ni Mojdeh ang makapasok sa Team Philippines na sasalang sa 2025 Southeast Asian Games sa Bangkok, Thailand sa Disyembre.
Magdaraos ang Philippine Aquatics Inc. ng national tryout sa Agosto upang madetermina ang mga magkukuwalipika para sa SEA Games.
- Latest
