CABC 2nd Mortabond Cup mosikad na

CEBU, Philippines —  Magpinaksitay na sa korte ang unom ka teams sa dihang ang Cebu Architects Basketball Club (CABC) 2nd Mortabond Cup mo-arangkada na karong adlawa diha sa Benedicto College-Cebu City Campus gym.

Sa dili magsugod ang aksiyon, usa ka simpleng seremonyas sa pagbukas ang ipahigayon sa ala-1 sa hapon.

Ang defending champion Duraplas Lite naglaraw nga makasakmit og sagunson nga titulo.

Gipaabot nga magsagubang sila og malisud nga hagit gikan sa Mortaseal, Strakgrout, Mortaflow, Ezbond ug Premium. Moduwa sila ubos sa single round robin format diin ang Top 2 awtomatik nga moabante sa semifinals uban ang twice-to-beat advantage.

Ang nahibiling upat ka teams magsangka sa knockout quarterfinals (No.3 vs No.6 ug No.4 vs No.5). Ang makalahutay motikang sa semis batok sa nag-unang duha ka mga koponan.

Ang mga mananaog maoy mabangga alang sa kampiyonato sa tinagakay nga duwa.