Junior Altas kinaldag ang Braves
MANILA, Philippines — Pinatumba ng University of Perpetual Help System DALTA ang Arellano University, 92-80, sa kanilang bounce-back win sa NCAA Season 100 juniors basketball tournament kahapon sa FilOil EcoOil Center sa San Juan City.
Bumanat si Jan Roluna ng 18 points, 9 rebounds, 2 assists, 2 steals at 1 block para sa pagbangon ng Junior Altas sa naunang kabiguan sa San Beda Red Cubs noong Linggo.
Nakahugot ng suporta si Roluna mula kina Lebron Jhames Daep, JD Pagulayan at Icee Callangan para sa 3-1 record ng Las Piñas squad.
Samantala, tinakasan ng nagdedepensang Letran Squires ang St. Benilde-LSGH Greenies sa overtime, 86-80.
Kumamada naman si Sean Salvador ng 24 points sa 71-69 pag-eskapo ng Mapua Red Robins sa Red Cubs.
Humakot si Sanlea Peñaverde ng career-high 37 points bukod sa 10 rebounds, 9 steals at 6 assists sa 83-77 pagdaig ng San Sebastian Staglets sa Lyceum Junior Pirates.
Tumakas rin ang Emilio Aguinaldo College Brigadiers sa Jose Rizal Light Bombers, 57-55.
- Latest
