Coach Mike Reyes motabang og giya sa Cebu classic
CEBU, Philippines — Ang beteranong coach nga si Mike Reyes magkupot og mahinungdanong papel sa Cebu Classic sa giatngan niining pagbalik sa 7th Maharlika Pilipinas Basketball League (MPBL) season nga gikatakdang mosikad karong Marso 8 didto sa Capital Arena sa Ilagan, Isabela.
Kini human gikuha sa Cebu management si Reyes isip kabahin sa ilang coaching staff.
Dad-on ni Reyes sa Cebu ang halapad niyang kasinatian nga iyang napupo gikan sa kapin sa duha ka dekada na niyang pagtimon og mga teams sa collegiate, commercial ug hasta na sa propesyonal nga mga liga.
Sa wala pa miulbo ang kalibuntahong pandemiya niadtong 2019, gitabangan ni Reyes ang Southwestern University (SWU)-Phinma Cobras pagbisbis sa unom ka tuig nilang huwaw sa titulo sa Cebu Schools Athletic Foundation, Inc. (CESAFI).
Duha ka tuig ang milabay, ang maghud sa kasamtangang head coach sa TNT Tropang Giga nga si Chot Reyes mitimon sa KCS-Mandaue ngadto sa korona sa 2021 Chooks-to-Go Pilipinas VisMin Super Cup Visayas division.
"Definitely ang maitulong ko is the execution of our concepts on both sides of the floor," matud pa ni Reyes.
Dugang niini, si Reyes moabag sa team pagkumpleto sa ilang lineup.
Human sa kontrobersiyal nga pagbiya ni Greg Slaughter, ang mga kanhi PBA players nga sila si Paolo Hubalde ug Rashawn McCarthy ug mga kauban nilang beterano sa MBPL nga sila si Darrell Manliguez ug Dennis Santos mao nay mibarog nga mga haligi sa kampanya sa Cebu.
Maghiusa sila og puwersa uban sa pipila ka lokal nga mga talento sama nilang Shaq Imperial, Jiesel Tarrosa, Dolan Adlawan ug Bryle Ivan Meca. Gikonsidera sab silang Jonel Bongancisco, Luigi Gabisan ug Bernie Bregondo apan wala pay pinal nga nasabotan ning puntoha. Ang Cebu momarka sa ilang pagbalik gikan sa lima ka tuig nga pahuway ning rehiyonal nga liga nga gitukod ni boxing legend Manny Pacquiao batok sa Caloocan Batang Kankaloo karong Marso 13 didto sa siyudad sa Pasay.
- Latest
