Bangga sa mga higante sa sidlakan Cavs Miwani sa Celtics

CEBU, Philippines —  Si Donovan Mitchell mipatuasik og 41 puntos aron pangulohan ang Cleveland Cavaliers ngadto sa 123-116 nga pagpiog sa defending champion Boston Celtics atol sa sangka tali sa mga higanteng koponan sa NBA Eastern Conference kagahapong adlawa didto sa TD Garden sa Boston, Massachusetts.

Ang Cavs miinat sa labing nindot nga rekord ning season ngadto sa 49-10 human mikulit sa ikasiyam nilang sagunson nga daog.

Nakab-ot kini sa Cavs human sila si nakasugakod sa pagmangtas ni Boston superstar Jayson Tatum nga hapit morehistro og triple-double uban ang 46 puntos, 16 ka rebounds ug siyam ka assists.

Si Darius Garland mihipos og 20 puntos samtang si Evan Mobley midugang og 17 puntos ug 12 ka rebounds alang sa Cavs nga nakalabaw sa unang higayon, 114-112, human sa 3-pointer ni Mobley ni nahibilin nga 8:43 sa katapusang kuwarter.

Si Jaylen Brown, nga mipabuto og 37 puntos alang sa Celtics, mitabla sa iskor, 114-114, apan si Mitchell mipasud sa duha ka sunod-sunod niyang layup aron ituboy ang Cavs ngadto sa kadaogan.

Didto sa Los Angeles, si Luka Doncic nagselebrar sa ika-26 nga sumad sa adlaw niyang natawhan pinaagi sa pagbubo og 31 puntos aron asawaton ang Lakers ngadto sa 106-102 nga pagpakaging sa silingan nilang Clippers.

Si LeBron James mipupo og 28 puntos ug 13 kaq rebounds alang sa Lakers.

Didto sa Atlanta, si Shai Gilgeous-Alexander mikolekta og 31 puntos sa dihang gipasukarap sa Oklahoma City Thunder ang Hawks, 135-119.

Sila si Duguentz Dort ug Jalen Williams mitampo og 20 puntos matag usa. Si Dort milansang og unom sa 23 ka tres nga gibomba sa Thunder batok sa Hawks.

Sa laing aksiyon, ang Denver Nuggets, nga gigatongan sa ika-28 nga triple-double ni Nikola Jokic ning season, mipakgang sa walo ka sagunson nga daog sa Detroit Pistons, 134-119.

Si Jokic miharos og 23 puntos, 17 ka rebounds ug 15 ka assists sa wala pa molingkod sa halos tibuok nga bahin sa katapusang kuwarter.

Dako sab og naambag si Jamal Murray nga mikadlit og 31 puntos ingon man si Michael Porter Jr. nga midonar og 28 puntos alang sa Nuggets.

Mikuha sab og atensiyon si OG Anunoby human miposa og tres sa pinal nga 5.3 segundos aron agakon ang New York Knicks ngadto sa 114-113 nga pagpayaka sa Memphis Grizzlies.

Samtang si Walker Kessler maoy bayani sa Utah human mihansak sa bola sa katapusang 9.7 segundos nga naghatud sa Jazz ngadto sa makapaisa'g balahibo nga kadaogan batok sa Minnesota Timberwolves, 117-116.