Lady Spikers kulang sa kumpiyansa - De Jesus
MANILA, Philippines — Nakukulangan pa si De La Salle University head coach Ramil de Jesus sa ipinapakita ng kanyang bataan sa UAAP Season 87 women’s volleyball tournament.
Kitang-kita ang pagkadismaya ni De Jesus nang walisin ang tropa nito ng defending champion National University sa kanilang unang laro sa season.
Ito ang unang beses na natalo si De Jesus sa first game nito sa liga sa nakalipas na maraming taon bilang head coach ng Lady Spikers.
Kaya naman matindi ang naging pagresbak ng La Salle nang patumbahin nito ang Adamson University sa kanilang sunod na laro para makabalik sa porma.
Sumampa sa win column ang La Salle tangan ang 1-1 rekord.
Umaasa si De Jesus na ito na ang magiging simula upang makabalik na sa porma ang kanyang tropa.
Aminado si De Jesus na kulang pa ang kumpiyansa ng kanyang tropa.
Ngunit tiwala ito na magbabalik ang bagsik ng Lady Spikers sa mga susunod na laban.
“Kulang namin is kumpiyansa pa. Sa first game namin, medyo nagkulang sa paniniwala sa sarili and sa team,” ani De Jesus.
Maraming natutunan ang La Salle sa huling dalawang laro nito partikular na ang malabanan ang matinding pressure lalo na sa mga krusyal na sandali ng laban.
- Latest
