Cavs mikulata sa Knicks

CEBU, Philippines — Ang Cleveland Cavaliers milampaso sa New York Knicks, 142-105, sa sangka tali sa mga higanteng koponan sa NBA Eastern Conference kagahapong adlawa didto sa Rocket Arena sa Cleveland, Ohio.

Si Donovan Mitchell mibomba og lima ka 3-pointers sa iyang 27 puntos alang sa Cavs, nga miposte sa ikaunom nilang sagunson nga daog aron pahugtan ang ilang pagkupot sa liderato sa East uban ang 46-10 rekord.

Mihimo sab og kasikas si Evan Mobley nga mihipos og 21 puntos ingon man si Jarrett Allen nga midugang og 10 puntos alang sa dominanteng Cavs nga sa usa ka higayon naglabaw og 42 puntos.

Si Jalen Brunson mi-iskor og 16 sa iyang 26 puntos sa nag-unang 12 minutos sa aksiyon apan nangitlog sa ikaduhang kuwarter sa dihang ang Cavs misutoy ngadto sa 77-50 nga labaw sa halftime

Mikadlit si Karl-Anthony Towns og 23 puntos alang sa Knicks, nga ikatulo sa East bitbit ang 37-19 nga baraha apan way daog sa unom ka duwa batok sa tulo ka teams nga dunay labing nindot nga rekords ning season, ang Cavs, Boston Celtics ug Oklahoma City Thunder.

"I think the biggest thing was just try to set the tone early," matud pa ni Mitchell. "For us, it's about how do we continue to build and get better -- we may see them in the playoffs. So we're trying to measure ourselves, continue to do what we've been doing."

Didto sa Orlando, ang layup ni Ja Morant mitabla sa iskor, 104-104, sa wala pa si Desmond Bane milansang og krusyal nga free throw nga nagsilyo sa 105-104 nga kadaogan sa Memphis Grizzlies batok sa Magic.

Si Morant mikadlit og 23 puntos samtang sila si Bane ug Jaren Jackson Jr. midugang og 16 puntos matag usa.

Duna pa untay tsansa nga modaog ang Magic apan ang itsa ni Paolo Banchero gitapalan ni Jackson dayong kapupos sa oras.

Sa laing aksiyon, si Kyle Kuzma mitali og 19 puntos aron pangulohan ang Milwaukee Bucks ngadto sa 104-101 nga pagpiog sa kanhi niya team nga Washington Wizards.

Ang alas sa Bucks nga si Giannis Antetokounmpo nalimitahan ngadto lamang sa 18 puntos tungod kay na-foul trouble.

Si Khris Middleton, nga naabot sa Washington human sa usa ka trade nga naghatud ni Kuzma sa Milwaukee, mikimada og 12 puntos sa iyang debut sa Wizards.

Nakasikit pa unta ang Wizards ngadto sa usa na lang ka lugas, 102-101, human sa tres ni Middleton sa nahibilin nga 61 segundos apan si Brook Lopez mipasud og duha ka free throws aron paginhawon og lawom ang Bucks.