Gealon Racing Team  misidlak sa Dagsik Duathlon

CEBU, Philippines — Ang Gealon Racing Team-Break 100 mipakita na sab sa ilang dominasyon atol sa Dagsik Duathlon ning bag-ohay pa lamang didto sa Citi di Mare sa South Road Properties (SRP). Si Judge Hazel Caraballe maoy gikoronahang kampiyon sa female 41-45 age group, samtang ang  teammate niyang si Andy Toniacao ang nanghawod sa male 31-35 category.

Ang tadhang mga runners nga sila si Artjoy Torregosa ug Lovely Gitaruelas mikuha sab og atensiyon human ilang gilupig ang kapin sa usa ka gatos ka mga duathletes aron sakmiton ang titulo sa all-female relay.

Sila si Markiven Revilla ug Rob Sabellano mipahiluna sa ikaduhang dapit sa all-male relay. Mao sab ang nakab-ot nilang Michelle Raniola ug Samstil Mamites nga nalandig sa ikaduhang puwesto sa mixed relay. Ang ubang mga batos sa GRT nga sila si Limito Caraballe, Ronald Sarmago, Jhonelle Tibay, Kelvin Boyles ug Vianne Pagnanawon dalaygon sab nga nakahuman sa tagsa-tagsa nila ka dibisyon.

"What a successful campaign!" buhagay pa sa manedyir nilang si Atty. Rey Gealon. "I thank God for the divine protection upon all the athletes who were spared from harm or injury. " "My gratitude goes to Break 100 who are instrumental in our endeavors by pouring their moral support on the team," dugang pa ni Gealon. "Likewise to the organizing committee headed by Jonathan Inting who made this activity a pleasurable and memorable one."