Brownlee handa na sa bakbakan
MANILA, Philippines — Desidido si naturalized player Justin Brownlee na matulungan ang Gilas Pilipinas na makuha ang dalawang panalo nito sa final window ng FIBA Asia Cup Qualifiers.
Kaya naman gagamitin ni Brownlee ang pagsabak ng Pinoy squad sa 2nd International Friendly Basketball Championship sa Doha, Qatar para mahasa pa ang kanyang shooting.
“I’m looking forward to it. Definitely I’m not going to take a break or take it lightly. We got two tough opponents coming up with the national team,” ani Brownlee.
Wala pang pahinga si Brownlee na sariwa pa sa pagbuhat sa Barangay Ginebra sa semifinals sa katatapos na PBA Commissioner’s Cup quarterfinal series.
Ngunit handa si Brownlee na ibuhos ang lahat upang makuha ang panalo sa qualifiers.
Unang makakasagupa ng Gilas Pilipinas ang Chinese-Taipei sa Pebrero 20 sa Taipei, Taiwan kasunod ang New Zealand sa Pebrero 23 sa Auckand, New Zealand.
“I want to be sharp and of course. I’m thinking of the playoffs, try to get better because I have not been shooting the ball well in the three-point line this whole conference,” dagdag ni Brownlee.
Kasalukuyang nasa Inspire Sports Academy ang Gilas Pilipinas para sa ilang serye ng ensayo bago tumulak sa Doha, Qatar.
Kasama ni Brownlee sa Inspire ang iba pang miyembro ng Gilas pool kabilang na sina Dwight Ramos, AJ Edu, Scottie Thompson, Troy Rosario, Japeth Aguilar, June Mar Fajardo, CJ Perez, Jamie Malonzo at Calvin Oftana.
Kinuha rin sina RJ Abarrientos at Ralph Cu bilang warm bodies sa pagsasanay ng Gilas Pilipinas.
- Latest
