Isa na lang sa UP

MANILA, Philippines — Kinapitan ng University of the Philippines sina JD Cagulangan at Quentin Millora-Brown upang makuha ang 73-65 panalo kontra defending champion De La Salle University sa Game 1 ng UAAP Season 87 men’s basketball finals na nilaro sa Smart Araneta Coliseum  kagabi.

Tumikada si Millora-Brown ng 17 points habang 13 ang binakas ni Cagulangan para sa Fighting Maroons na namumuro sa pagsilo ng pang-apat na korona sa kanilang best-of-three finals kontra Taft-based squad.

Lumabas agad ang bangis ng Green Archers sa first quarter nang hawakan nila ang anim na puntos na bentahe, 18-11, ngunit mabalasik din ang laro ng Fighting Maroons kaya nanatili silang nakadikit at natapyasan nila sa dalawa ang hinahabol, 41-37 sa halftime.

Naging maangas naman ang opensa ng F­ighting Maroons sa third canto nang makalamang ito ng apat, 45-41 may 3:53 pa sa orasan bago ang fourth quarter.

Naitabla ng DLSU ang iskor sa 45-all sa 2:32 mark, pero determinado ang UP at nakuha ulit nila ang manibela, 54-50 sa pagtatapos ng 3rd canto.

Lalong nagliyab sa opensa ang UP sa payoff period nang lumubo ang kanilang abante sa 11 points, 65-54 may 5:35 minuto pa sa orasan.

Naibaba ng La Salle sa apat na puntos ang hinahabol, 61-65 matapos magtala ng back-to-back layups ni Mike Philips para pangunahan ang kanilang 7-0 run may 1:42 na lang sa payoff period.

Subalit naging matatag ang UP sa dulo upang ma­itakas ang importanteng panalo at mamuro sa pagsilo ng korona.

May tsansa ang Figh­ting Maroons na tapusin ang serye sa Game 2 sa Miyerkules sa Mall of Asia Arena sa Pasay City.