Pason kampiyon na sab sa One Central Eagles-PICPA chessfest

CEBU, Philippines — Si Allan Pason miangkon og balik sa iyang trono human gidominar ang One Central Eagles Region (TFOE-PE, CVR 16) ug Philippine Institute of Certified Public Accountants (PICPA)-Cebu Chapter 2-in-1 Rapid Chess Tournament ning bag-ohay pa lamang didto sa Cebu Chess Club sa Robinsons Galleria Cebu.

   Nagtabla si Pason ug si Ariel Joseph Abellana bitbit ang managsamang 8.0 puntos apan si Pason, ang unang kampiyon ning tinuig na kompetisyon niadtong 2022, maoy mibulsa sa unang ganti nga P10,000 kortesiya sa mas taas niya nga tiebreaker. Si Abellana nakadawat og P5,000 sa pagtapos niya sa ikaduhang luna.

Si International Master Rico Mascariñas mikabi og P3,000 sa pagsolo niya sa ikatulong puwesto. Sila si John Dave Lavandero, ang naghari sa miaging tuig, National Master Rommel Ganzon, Duane Borgonia ug Arena Grandmaster Venancio Loyola, Jr. maoy mi-okupar sa ikaupat ngadto sa ikapitong dapit uban ang 7.0 puntos matag usa.

Sila si NM Jayson Salubre, Michael Pinar, Arena IM Isagani Luna Jr. ug Jethro Jimenez naglangkob sa Top 11 bitbit ang 6.5 puntos.

Naapil sa Top 15 sila si Alfer Joseph Fernandez, Ernie Abanco, Jervy Villarin ug Edelyn Vosotros uban ang 6.0 puntos matag usa.

Sa laing bahin, ang nanghawod sa ilang mga kategoriya mao sila si Mascariñas ug Reynaldo Flores (seniors), Kyle Rim Sygaco ug Carlo Maraat (CPAs), Ernie Abanco ug Seigfred Mark Alasagas ((Eagles) ug Edelyn Vosotros and Adelyn Bensi (female).

Samtang ang Top 5 sa Under 16 division mao sila si Maria Kristine Lavandero, Matt Andrew Pasignajen, Aarav Amit Kale sa India, Vince Chrysler Sumgat ug Davaadorj Mongoljin sa Mongolia.

Giorganisa ni Atty. Rheneir Mora sa Mora, Sanchez, Meñoza and Associates CPAs , ang maong kalihukan nagmalampuson tungod sa suporta sa PICPA-Cebu Chapter ug The Philippine Eagles-Central Visayas Region XVI.