Italian coach hahawak sa Nxled

MANILA, Philippines —  Matapos si Chinese tactician Chen Gang ay si I­talian mentor Ettore Guidetti naman ang hahawak sa Nxled para sa dara­ting na 2024-2025 Premier Volleyball League (PVL) All-Filipino Conference sa Nobyembre.

Kumpiyansa si Guidetti na matutulungan niya ang Chameleons na makapasok sa playoffs matapos ang 1-7 record para sa 10th-place finish sa ilalim ni Chen sa nakaraang 2024 Reinforced Conference.

“The only thing that I really hope from my team is that they try to be aggressive every single game and try to win against super good teams,” wika ni Guidetti na nag-coach din sa Italy, Poland at Sweden.

Si Guidetti ang ikalawang Italian coach na nasa bansa matapos si veteran tactician Angiolino Frigoni na gumigiya sa Alas Pilipinas men’s national team.

Sina Lycha Ebon, Jho Maraguinot at Chiara Permentilla ang muling babandera sa Nxled para sa All-Filipino Conference.

Samantala, handang-handa na ang Creamline sa pagtatanggol ng kanilang korona kung saan posibleng maglaro sina Alyssa Valdez at Tots Carlos.

Hindi sumalang sa aksyon sina Valdez at Carlos sa nakaraang 2024 PVL Reinforced at Invitational Conferences dahil sa kanilang mga injury.

“I’d say nasa more than 50% na,” sabi ng four-time PVL MVP na si Valdez na sumasali na sa ensayo ng Cool Smashers kasama si Carlos.