Jerusalem nagpanikad modepensa atubangan sa iyang mga kababayan

CEBU, Philippines — Ang Pinoyng' kampiyon nga si Melvin Jerusalem gibati og tumang kahinam nga manalipod sa iyang trono atubangan sa iyang mga kababayan duha ka adlaw gikan karon.

Si Jerusalem gikatakda nga modepensa sa iyang World Boxing Council (WBC) minimumweight title batok sa way pildeng Meksikanong challenger nga si Luis Castillo karong Domingo didto sa Mandaluyong City College Gym.

Mao kini ang unang depensa ni Jerusalem sa korona nga iyang nasakmit human midaog pinaagi sa split decision batok sa Hapon nga si Yudai Shigeoka didto sa Nagoya niadtong Marso.

Alang sa 30-anyos nga si Jerusalem, usa ka damgo nga natuman ang iyang pag-away atubangan sa iyang mga Pinoy fans.

“Sobrang laking impact para sa akin na lumaban sa Pilipinas. Pangarap ko talaga na magdepensa ng world championship dito sa Pilipinas,” dason pa ni Jerusalem, nga lumad gikan sa Manolo Fortich, Bukidnon. Si Jerusalem nagbitbit og 22-3 rekord uban ang 12KOs, samtang ang 27-anyos nga si Castillo nagkupot og perpektong 21-0 nga baraha uban ang usa ka tabla ug 13KOs.

Ning mahinungdanong sangka, si Jerusalem misaad nga buhaton ang tanan kutob sa iyang mahimo aron magpabilin ang bililhong bakus sa iyang hawak.

“Gagawin ko yung best at papakita ko ang pride ng Pillipino,” pasalig pa ni Jerusalem.