SNC-A nakauna sa Couples For Christ Inter-Chapter League

CEBU, Philippines — Nagkumboya'g 33 puntos silang Chris Englis ug Raymil Fernandez alang sa  SNC-A nga miangkon sa Game-1 sa ilang best-of-three finals series sa Couples For Christ Inter-Chapter League.

Si Englis mipaksit og 17 puntos, samtang si Fernandez mipugnit og 16 puntos sa SNC-A nga midaog sa PPGT-A, 78-74 niadtong Martes sa gabii diha sa Tayud, Consolacion gym.

Lubong og 12 puntos sa halftime, apan bisan pa niini ang SNC-A wala kawad-i sa paglaum ug milusad sila'g 8-0 run sa third period hangtod nakatabla pagtapos sa maong kuwarter. Ang SNC-A mihimo og laing mainitong rally aron moposte'g 12 puntos nga labaw.

Wala sab magpa-alkanse ang PPGT-A ug mibawos kini'g rally sa kuwatro minutos kapin ang nahabiling oras sa final period nga nakapasikit sa duwa.

Ang duha ka free throws ug lay-up ni Fernandez maoy nihatag og kuwatro puntos nga kadaogan sa SNC-A.

Si Jonnas Cayanong miiskor og 30 puntos, samtang Roy Ermac mitampo'g 13 puntos sa napildeng PPGT-A nga tinguhang mobawos  sa Game 2 karong Agosto 25.

Sa unang duwa, ang Tayud-A milubong sa Tayud-B, 110-89 sa ilang knockout match alang sa ikatulong dapit.

Lima ka players sa Tayud-A ang miiskor og double figures pinangulohan ni Cirilo Soco Jr. sa makabungog nga 29 puntos. Si Adonis Judaya miamot og 23 puntos, si Raymond Laroza mitampo'g 18 puntos, si Nilo Ibale dunay 17 puntos ug Justin Earl Cena sa iyang 11 puntos.

Ang Tayud-B gipangulohan sab nilang Ares, Maglasang ug Alcuizar nga parehong mirehistro'g 15 puntos.

PUNTOS MATAG USA

Unang duwa:   (Para 3rd )

TAYUD-A (110) — Soco Jr. 29, A. Judaya 23, Laroza 18, Ibale 17, Cena 11, B. Judaya 8, M. Judaya 4

TAYUD-B (89) — Ares 15, Maglasang 15, Alcuizar 15, Abordo 12, Cose 11, Villalon 11, Contratista 6, Judaya 4

Ikaduhang duwa:

(Game 1, Finals)

SNC-A (78) — Englis 17, Fernandez 16, Tisoy 13, Quilaton 6, Estillore 6, Jo. Ricamora 6, Fajardo 5, Bercienes 3, Je. Ricamora 2, Remarca 2, Paeste 2

PPGT-A (74) — Cayanong 30, Ermac 13, Arrabis 8, Abatayo 8, Dahuya 7, Luchavez 4, Beron 2, Bihag 2