"Mano a Mano sa sugbo" Garces, paradero magsinukmagay na

CEBU, Philippines — Si Kit Ceron Garces sa Prime Stags Stable magsagubang og laing malisud nga tahas sa iyang karera sa dihang makigbinukbukay siya ni kanhi world title challenger Robert "Super Inggo" Paradero sud sa 10 ka hugna nga kumbati ubos sa flyweight division nga maoy main event sa  "Mano a Mano sa Sugbo" fight card nga gipasiugdahan sa Prime Stags Promotions karong adlawa (Sabado, Hulyo 20) didto sa Skyhall sa SM Seaside City.

Ang puno sa aksiyon nga pasundayag nga libre sa publiko magsugod sa alas-3 sa hapon.

Si Garces, 25 anyos, nagbitbit og 7-1 win-loss rekord uban ang 5KO, samtang si Paradero nagkupot og 19-7-2 nga baraha uban ang 13KOs.

Kon kasinatian ang hisgutan, ang garbo sa dakbayan sa Talisay nga si Garces dehado apan andam siyang sagubangon ang dakong hagit nga nag-atang kaniya sa unahan batok sa usa ka beteranong kontra nga maguwang niya og tulo ka tuig.

"Wala ko ma-intimidate kay kana iyang pagka-beterano amo na gipangandaman og maayo," matud pa ni Garces, nga gikan sa duha ka sagunson nga daog batok nilang Ernesto Camiguing ug Harry Nier sukad siya nakatilaw sa una niyang pilde pinaagi sa unanimous decision sa kamot ni Noli James Maquilan niadtong Enero 11 didto sa Cebu City Sports Center.

"Grabi sab amo training mao nang confident kaayo mi nga modaog. Kana segurong knockout maabot ra late rounds na," dugang pa ni Garces.

Sa iyang bahin, si Paradero misaad og usa ka eksplosibong binombahay ibabaw sa ring batok ni Garces.

"Sakto mi sa training. Dili ko makaingon kon dunay ma-knockout but tagaan nako og maayong dula ang mga tawo. Binundakay gyud ni ugma (today)," padayag pa ni Paradero.

Sa laing bahin, gawas ni Garces, lima pa ka mga pambato sa Prime Stags ang mopakita'g aksiyon ning promosyon nga gipaluyohan sa Winzir.

Si Carlo Bacaro mohamag ni Jose Roda Jr. sa Magdiwang Romblon, si Michael Adolfo makigsangka ni Vergilio Silvano sa Agus, Lapu-Lapu City, si Johnver Espra mosakbang ni Franz Carl Muyso sa Mabuhay, General Santos City, si Jhon Anthony Magos makigpinaksitay ni Ronald Bulacan sa Lupon, Davao Oriental, samtang si Jimmybie Cais makigharong ni Neel Jacamos sa Amoy Gym sa GenSan.

Sa laing engkwentro, si Ben John Rey Yagahon sa Verano Gym makig-atbang ni Ruel Julian sa Malaybalay, Bukidnon.