Irving gi-operahan
![Irving gi-operahan](https://media.philstar.com/photos/2024/07/18/kyrie_2024-07-18_01-06-56.jpg)
CEBU, Philippines — Si Dallas guard Kyrie Irving, nga nagkupot og mahinungdanong papel sa pag-abante sa Mavericks sa miaging NBA Finals, gi-operahan kagahapong adlawa aron ayuhon ang nayayay niining walang kamot.
Sa usa ka opisyal nga pamahayag, ang Mavs mipahibawo nga si Irving na-angol atol sa ilang training sayo ning bulana.
Mohatag sila og dugang impormasyon kabahin sa kondisyon ni Irving sa umaabot labi na kon kini gikinahanglan.
Ang Australyanong si Irving, nga walo ka higayon nahimong NBA All-Star, mi-average og 22.2 puntos ug 5.1 assists matag duwa sa post-season.
Bisan pa man sa impresibo niyang salida, ang Mavs gipilde sa Boston Celtics sud sa lima ka duwa sa ilang best-of-seven championship series.
Sa miaging season, si Irving nakahiagum og injury sa tuo niyang kumagko.
Niadtong 2012 sa wala pa ang ikaduha niyang tuig sa NBA uban sa Cleveland Cavaliers, nabuak ang tuo niyang kamot human kini niya gihapak sa pader atol sa ilang praktis.
Ang 32-anyos nga si Irving gikan nga miduwa sa labing una niyang tibuok nga season uban sa Mavs.
Siya ug ang star teammate niyang si Luka Doncic nanghinaut nga ang pag-abot ni Klay Thompson sa ilang poder makatabang sa ilang kampanya nga makabalik sa finals sa umaabot nga season.
- Latest