Edwards nag-wild, Wolves giunhan ang Nuggets

CEBU, Philippines — Si Anthony Edwards mipabuto og playoff career-high 43 puntos sa dihang gipakuratan sa Minnesota Timberwolves ang defending champion Denver Nuggets, 106-99, pagsugod sa ikaduhang hugna sa NBA playoffs kagahapong adlawa didto sa Ball Arena sa Denver, Colorado.

Mangtas kaayo si Edwards nga mipasud og 17 sa 29 niya ka itsa ug way sipyat sa unom niya ka free trows.

Si Edwards mikadlit og 16 puntos sa unang kuwarter, ang 11 niini mituboy sa Wolves ngadto sa mainit nga 14-2 nga sinugdanan.

Sa kinatibuk-an sa unang tunga, si Edwards mibubo og 25 puntos hinungdan nga pabiling naglabaw ang Wolves og kuwatro puntos, 44-40, sa halftime.

Mikuha sab og atensiyon ang NBA Sixth Man of the Year nga si Naz Reid nga mibomba og 14 sa iyang 16 puntos sa katapusang kuwarter alang sa Wolves.

Si Karl-Anthony Towns mitali og 20 puntos samtang si Mike Conley miposte sa tanan niyang 14 puntos sa second half nga iyang gipalamanan og 10 ka assists. Nagparamdam sab si Rudy Gobert bitbit ang 13 ka rebounds alang sa Wolves.

Si two-time MVP Nikoka Jokic maoy nangu sa Nuggets uban ang 32 puntos, siyam ka assists ug walo ka rebounds.

Midugang si Michael Porter Jr. og 20 puntos samtang si Jamal Murray mihipos og 17 puntos sa pilderong kawsa.