CEBU, Philippines — Gipatikangkang sa Boston Celtics ang Miami Heat sa hingpit, 118-84, aron pag-abante sa NBA Eastern Conference semifinals nga gikalipay sa ilang fans kagahapon didto sa TD Garden sa Boston, Massachusetts. Gihuman sa Celtics ang serye sa baraha nga 4-1 aron pagtikang sa ikaduhang hugna sa playoffs diin ilang sangkaon ang Cleveland Cavaliers o ang Orlando Magic.
Sila si Jaylen Brown ug Derrick White mihipos og 25 puntos matag usa alang sa Celtics, nga wala maapektuhi bisan og wala ang usa sa ilang mga sinaligan nga si Kristaps Porzingis kay dunay gihambin nga injury.
Si White miposa og lima sa 3-pointers samtang si Jayson Tatum midugang og 16 puntos, 12 ka rebounds ug tulo ka assists.
Dako sab og naambag si Sam Hauser bitbit ang 17 puntos ingon man si Jrue Holiday nga mitali og 10 puntos.
Didto sa West, si Luka Doncic mipabuhagay og 35 puntos, 10 ka assists ug pito ka rebounds sa dihang gikastigo sa Dallas Mavericks ang Los Angeles Clippers, 123-93, aron pagposte og 3-2 nga labaw sa ilang serye. Mahimo nang dag-on sa Mavs ang serye sa ilang pag-host sa Game 6 karong Sabado.