CEBU, Philippines — Ang Philadelphia 76ers ug ang Milwaukee Bucks naka-angkon pa og laing kinabuhi human gipayaka ang inilog nilang mga karibal sa NBA Eastern Conference first-round playoff series kagahapong adlawa.
Si Tyrese Maxey miposa og pito ka 3-pointers sa iyang 46 puntos samtang si Joel Embiid mipatak og triple-double uban ang 19 puntos, 16 ka rebounds, ug 10 ka assists sa dihang gipakuratan sa Philadelphia 76ers ang New York, 112-106, sa overtime aron putlon ang labaw sa Knicks ngadto na usa na lang ka duwa, 3-2.
Nagdanga-danga na unta ang Knicks ngadto sa kadaogan human gitabangan ni Jalen Brunson ang iyang koponan pagposte og sayes puntos nga labaw sa pinal nga 29 segundos sa katapusang kuwarter.
Apan si Maxey milansang og duha ka sagunson nga lagyo kaayong mga tres aron pagtukod sa duwa ngadto sa overtime.
Sa dugang singko minutos sa aksiyon, si Brunson mikadlit og lima ka sunod-sunod nga puntos nga nakapahugyaw sa ilang mga fans didto sa Madison Square Garden.
Apan sa kalit lang nahilom ang Knicks human sila si Maxey ug Embiid milusad og nagkayong 9-0 run aron pagpalabaw sa Sixers sa hingpit, 106-102.
Igo lamang nakatabla ang Knicks sa iskor nga 106-106 gumikan kay ang Sixers mitali sa katapusang sayes puntos sa kulbahinam nga aksiyon.
Si Tobias Harris midugang og 19 puntos samtang si Kelly Oubre Jr. miamot og 14 puntos alang sa Knicks.
Sa laing duwa, ang Bucks milampaso sa Indiana Pacers, 115-92, aron inaton ang ilang serye ngadto sa Game 6.
Sila si Khris Middleton ug Bobby Portis ang nangu sa Bucks bitbit ang 29 puntos matag usa samtang si Malike Beasley midonar og 18 puntos.
Didto sa Cleveland, si Donovan Mitchell mibubo og 14 sa iyang 28 puntos sa katapusang kuwarter sa dihang ang Cavaliers nakalingkawas batok sa palaban nga Orlando Magic, 104-103, aron pagposte og 3-2 nga bentaha sa ilang serye.