CEBU, Philippines — Ang Miami Heat mipauwan og 3-pointers aron bihagon ang Boston Celtics, 111-101, ug tablahon ang ilang NBA Eastern Conference first-round playoff series sa baraha nga 1-1 kagahapon didto sa TD Garden sa Boston, Massachusetts.
Bisan og wala ang injured nilang alas nga si Jimmy Butler, ang Heat nakamaneho pagpiog sa Celtics nga nakahatag kanila og dugang kadasig ilabi na kay ang serye mobalhin didto sa ilang korte alang sa Game 3 karong Domingo.
Salamat sa balanse nilang ataki diin ang tanang starters sa Heat mikadlit og double digits ubos sa pagpangu ni Tyler Herro nga mipupo og 24 puntos.
Sa kinatibuk-an, ang Heat milansang og 23 sa gitira nilang 43 ka tres aron palukapahon ang Celtics, unom niini gikan ni Herro.
Si Caleb Martin mitagak og lima ka tres sa iyang 21 puntos. Si Bam Adebayo mihipos sab og 21 puntos samtang sila si Jaime Jaquez Jr. ug Nikola Jovic 11 nagkumboya'g 25 puntos alang sa Heat.
"It's not all about scoring, in the playoffs you gotta make the right play. Our guys showed up tonight -- Caleb Martin, Nikola, Jaime," padayag pa ni Herro.
Si Jaylen Brown mipabuto og 33 puntos samtang si Jayson Tatum mitali og 28 puntos apan nangahoyhoy ang ilang abaga kay sa wala damha nahagba ang Celtics human gilat-an ang Heat og 20 puntos sa pasiunang duwa sa ilang best-of-seven series.