Cone midugang ni Japeth sa Gilas pool

CEBU, Philippines — Padayong misidlak ang karera ni Japeth Aguilar.

Kini human ang 37-anyos nga beterano sa Barangay Ginebra gikuha nga usa sa duha ka players nga gidugang ni coach Tim Cone sa Gilas Pilipinas pool.

Mao kini ang nakitang alternatibo ni Cone tungod kay gihamok man og injury ang frontcourt rotation sa Gilas nga gilangkoban nilang June Mar Fajardo, Jamie Malonzo, ug AJ Edu.

Gawas ni Aguilar, gibira sab ni Cone si Ateneo big man Mason Amos isip laing alternate sa Gilas.

"The first window showed us that we were a little thin in our lineup after AJ Edu, June Mar (Fajardo), and Jamie (Malonzo) missed our game vs. Chinese Taipei due to injuries," matud pa ni Cone. "We were left with only nine players and only Japeth as replacement to make 10."

"So now Japeth and Mason will practice and travel with the original 12 and be ready to step in if the need arises," dugang pa ni Cone.

Human mipakita'g aksiyon uban sa national team sa unang bahin sa Asia Cup qualifiers, si Aguilar gibayaw nga co-MVP ni Robert Bolick sa miaging PBA All-Star Game didto sa Bacolod City.

Nindot sab ang gipakitang salida ni Aguilar alang sa Gin Kings sa Philippine Cup. Si Aguilar sakop sa Gilas nga milangkat og makasaysayanong gold medal sa 19th Asian Games didto sa Hangzhou, China sa miaging tuig.

"If we lose one of our bigs, Japeth will step in," pasabot pa ni Cone. "If any of the others, Mason will fill the hole. Mason, too, because of his youth, projects as one of the regulars over time." Ang Gilas kasamtangang nangandam sa umaabot nga qualifying tournament alang sa Paris Olympics.

Anaa sab sa team sila si Kai Sotto, Scottie Thompson, Dwight Ramos, Calvin Oftana, Edu, CJ Perez, Chris Newsome, Carl Tamayo,  ug Kevin Quiambao.